Otto Gier, Backnanger Urgestein und früher Mitglied der Schleuderbrett-Akrobaten »Rondos«, schrieb die folgende gereimte Kritik:

Jetzt merk i erscht, was ons Backemer seither g’fehlt hat,
des Büachle »Backnang, meine Stadt«!
I han des jo, druckfrisch, scho vor dr Veröffentlichung gseh,
em verfasser sei Vadder hat mir’s gä.
I ben auf Anhieb begeistert gwesa
ond ben glei nog’hockt ond han’s glesa

I, oiner der von Kunst net viel Ahnung hat,
woiß jetzt, so dargestellt isch onser Stadt
a absoluter Kunstgenuss!
Deshalb, des Büachle zu besitza, isch a absolutes Muss,
denn vom höchsta Buckel bis zur Talessohle
isch des das echte »Backana« ond koi Murr-Metropole!

En dem Werk zu lesa isch a Freid ond koi Scheiß
ond des älles zu ama angemessana Preis!
Außerdem isch des Buach, so kann i mir denka,
a herrliche Gabe zum verschenka!
I persönlich war von de Bilder ganz verhext,
ond von dem alles umfassenda ond doch kurza Text!

So geschildert
und bebildert
isch des a Meisterstück, das auch der kleine Mann
mit Durschnittsbildung begreifa kann.
Ganz raffiniert ond wirklich g’scheit,
isch au die Verbindung von einst ond heut!

Ond zwischa de Zeila beweißt der Autor
seinen hintersinniga Humor.
Do wo i laut sag: »Die Stadtplaner hen da Biegel versaut
ond dort an rechta Scheiß nobaut!«
Do sagt der Verfasser, diplomatisch fein:
»Nach Ansicht der Stadtplaner fügt sich der Biegel harmonisch in die Altstadt ein!

Irgendwann mach i bei dem Autor a B’süachle
ond bedank me für des Büachle,
denn des isch wirklich ebbes schö’s
ond koi so gschwollener Luckeleskäs.
Des isch net mit G’walt an de Hoor herzoga
sondern fundiert, recherchiert und ausgewoga!

Im Nachwort sagt der Verfasser ganz am End,
dass er es sehr erfreulich fänd,
wenn mr seine Texte leicht ond flüssig lesa könnt.
Man kann! Ond ebbes fend i ganz b’sonders angenehm,
man kann die Texte auch gut verstehn.

Zum Schluss no ebbes, des sei hier nicht vehehlt:
So a netter »Stadtbegleiter« hat bis jetzt en Backana g’fehlt!